১. মনান যেধ চায় এই জুম, এই জুম ঘর,

এই জুম লাঙেল ছিড়ি  দ্বিবে চোগ যিদ্দুর যায় বেগ`কানি মর,

কনদিন খুলি কোয় ন` পারানার গমপানা-কোচপানার কধা,

মর কিজেকর র` যিদ্দুর বাম ভাঙে সিদ্দুর সং বেগ`কানি মর।

ম আহওচ, মর নোনেয়্যা বিগিদি তিরোজী সবন বনা বনা,

রাঙা-রাঙা, এ্যাহল-সোচ`র তামাঝাত মর চিদ,

মর চিন যুগ যুগ ধরি এই জুম তুগুনোত রেগা বানি আঘে।

এ মন যিদ্দুর যেধ চায় সিদ্দুর মর ঠিগেনা মর আওচ যেনক্যে গরি আওহঝি অহবার চায় সিদ্দুর মর আহওচ ঝার,

ঝারর শাওনর কদম ফুল মনত গাধি তায় মর মনত উদন বজন্দিত।

এ কিরবে মনর নিচুলি নকবাচ কিদিরিঙ মনান আওঝর জুম তুগুনে ভালেদি ছিদেয় আহওজে।

 ২. জুম পহধর নিত্তাগে এই জুনোপহরত বজি জুমঘরত কধক জুনিপুগ চেই চেই কাধেদং রেইত।

এক্খা এক্খা মনে মঞ্জক্কা  ইঝোরত হেলান দ্বি মিধে মিধে বৈয়েরান কেয়েত বাঝি সুঘর দিনুনে কধা কধাক।

 কবরক, তা পৈনাঙির তোলবিচ গরিধ` জুম্মবি,

আহওঝর ম কাম্বোবি রেত্তো এহলে ঘর কাম পুরেলে ম কায় এনেই বঝিদো।

ম কায় এলে, ম কায় বহলে কধ কধা মনত উদিধো পরিধো।

 কোচপাঙ সে বিদি যেয়্যা দিনুন সেই সুদিনোর,

সেই নকবাচ্যে অজাবিন আন্ধারত  যদেপদে মুই পহধ হারেয়্যং

নাবুঙ পরানান আরি যেয়্যা পহধ  তোগেই ন`পোক ন`পোক হারেয় যোক জুম পহধর নিত্তাগে।

৩. মুই ন থানার পরে মুই ন থানার পরে  ইরুক পিত্তিমির সুধোমে  এজান গরি বেল উধিবো,

বেল দুবিবো  দগিনো বোয়ের খেলিবো  তর নুও কজমা মন` পিত্তিমিত।

এ ফেলা যেয়্যা কবির জাগা ন অহ্ব আর তর কজমা ধেলানিত। 

নুও নুও পেইক এবাক  গীত সুনেবাক মতুন বেচ বেচ গরি। 

চেরোকিত্তে তারুম, জুম অহহ্ব  গঙানির কেয়েত ফাগুন ফিরিবো  আর` নুও গরি ত খুঝি খুঝি মেয়েনিত।

 মুই ন থানার পরে  কিঝু দিন তর মন কানিবো  পিত্তিমি গলিবো তর কানোনি ধেরধেজ্যা চোঘো পানিত। 

তর মর সমারে কাদেয়্যা দিনুন ইন্ধোত উধিবাক  পিবির পিবির বোয়েরানি কবগি মনে মন মিলোনিত  আজি যেয়্যা দি-জনে জুমর তিরোজে। 

মনে অহহ্ব মুই এভ আঘঙ ত কাআই  এভ কবিতে কহ তর ধাগত বঝি। 

খালিক সে দিনুন বেচ ন থেবাক ত চিদোত  বোয়েরানি গঙিবো আর` এক ফাগুনোত। 

এজান গরি মুই তত্থুন আজি যেম আজি যেম বেগর মনত্তুন।

ফুলুন ঝরিবাক, গাঝ পাদা ঝরিবু নুও গরি ফুদিবাক ফুলুন নুও গরি ত মনত বিঝু এভ মুই ন থানার জেরেও।

৪. আহওচ ভাবঙর মুই পাচ কুড়ি বজর পর পর এ পিত্তিমিত জনম লোম আওজে মুই রিনি চেম্বি অঝার পিত্তিমির সভ্যতা।

 ম ঈত্তো কুধুম, মর ঈধ,  মর পেলে যেয়্যা চবা-চাল মানেয়র সুদোম,

পাচ কুড়ি, দঝ কুড়ির  বিজোক বিজিরেম ভারী তিরোজে।

অলে বেড়েম ম কিদিরিঙ রঙ-বেরঙর রাঙামাত্যের

তজিমপুরোর  মুরোউনোর রান্যেতুগুনোর পধে পধে যেনি এ্যাল,

অলে থেব  সরান চেয়্যে মানেয়র লাড়েয়র সংমিলনির হূচ।

৫. কায়,তুঅ দূরত মুই জুমফুল নয়, 

মরে সেনে কিউই ন মাধান মুই জুনিপুক নয়,

সাঝন্যে গেলে ঘুরঘুচ্যা আন্ধাআন এহলে ম পহরান দোই দোল দোল সবন দেগিবাক।

মুই অঝার আগাচ নয়,

তর মন হরানত ঝড় ওই লামিম।

মুই এহক জাত অঘা,সেদাম পাঞ্জা এক মানেই মরে কিওই ধারাচ ন গরন,

মরে কিওই ন তগান,

তলবিচ ন গরন জুমপধর নকবাচ লবিয়দিত।

নিত্তাগে মুই আহঝি যাং কায় এনেই দূরত সরি যান,

মুই সরি যাং লড়বো মন ঘরবো,

সেদামআন নুনজো চেরোপালা সমাজ,

আহওচ,সবন বেক মনর।

 মুই খবর পাঙ বেক জাগাত,

বেক অক্তর দিনুনোত মর আহওচ,

মর সেদাম হোচপেবার,

গমপেবার কিউই নেই।

 ***পরিচিতি: ম্যাকলিন চাকমা পার্বত্য চট্টগ্রামের প্রগতিশীল তরুণ কবি ও সাহিত্যিক। জন্ম ১৯৯৩ সালের ১০ই অক্টোবর, রাঙ্গামাটি, পার্বত্য চট্টগ্রাম, বাংলাদেশ। প্রকাশিত কাব্যগ্রন্থ তিনটি। তিনি দুটি সাহিত্য ম্যাগাজিন সম্পাদনা করেছেন। চাকমা ভাষায় ছোটগল্প, গান ও নাটক লিখছেন। বর্তমানে মোনঘরে সহকারী প্রকাশনা কর্মকর্তা হিসেবে কর্মরত আছেন। পাশাপাশি চিটাগং হিল ট্রাক্টস রাইটার্স ইউনিয়নের কার্যনির্বাহী কমিটির সহ গবেষণা সম্পাদক পদে দায়িত্ব পালন করছেন।***